Pranë vilës së Zogut në Durrës po ngrihet një tjetër vilë që siç shihet në foto është një ndërtim me qindra metra katrorë. Ish-kryeministri Sali Berisha ka denoncuar sot se “godina në ndërtim e sipër i përket pikërisht Lefter Kokës, ministrit aktual të Mjedisit, dhe ish-kryetar Bashkie në Durrës”.
“Nën sarajet e mbretit Zog po ngrihen dhe lartësohen çdo dite sarajet e ministrit Koka”, shkruan Berisha.
Nuk ka ende një reagim nga Lefter Koka, nëse vertet ky që shohim në foto, është objekti i tij. Gjithashtu as Bashkia e Durrësit, që ka dhënë lejen e ndërtimit, nuk ka reaguar, edhe pse ndërtimi po bëhet në një kodër që disa herë ka pësuar shembje si pasojë e erozionit të tokës.
“Pallati i Zogut” është një objekt simbol në Durrës, i vendosur në majë të një kodrine, nga ku mund te shohesh si ne pellembe te dores qytetin bregdetar te Durresit, ndaj mbetet një vend i lakmuar.
Në faqen zyrtare online të pasardhësve të Ahmet Zogut, për këtë ndërtesë shkruhet:
“E ndërtuar në vitin 1927, kjo vile ishte një dhuratë personale për Mbretin Zog I, nga komuniteti i biznesit të Durrësit ne shenjë respekti dhe nderimi. Ndërtuar në formën e një shqiponje, ajo u ngrit në pikën më të lartë të qytetit të Durrësit. Ajo është shumë e famshme për mermerin e saj Blu dhe sallonin madheshtor…”
Në 1940 Giusepe Martino një milioner italian e konsideronte si pallatin veror me të bukur ne Ballkan.
