Ndeshjet e kategorisë Superiore do të rikthehen në datat 7 dhe 8 dhjetor. Njoftimi është bërë nga vetë Federata Shqiptare e Futbollit. Më konkretisht, në datën 7 dhjetor do të luhen ndeshjet Tirana-Kukësi (ora 16:30), Luftëtari-Vllaznia (ora 13:30) dhe Bylis Partizani (ora 13:30).
Ndërsa të dielën, në datën 8 dhjetor do të përballen Laçi me Flamurtarin në orën 13:30 si edhe Teuta me Skënderbeun në orën 16:30. Për ndeshjet e javës së ardhshme, do të ketë një njoftim të dytë. Kujtojmë që FSHF mori vendimin për të shtyrë të gjitha ndeshjet pas tërmetit tragjik që gjunjëzoi Shqipërinë mëngjesin e të martës, nga ku u shënuan 51 viktima dhe mbi 900 të plagosur.
“Federata Shqiptare e Futbollit dëshiron të njoftojë të gjithë opinionin publik, klubet, tifozët, se për shkak të gjendjes së jashtëzakonshme që është krijuar pas tërmetit që ka goditur vendin tonë ditën e sotme, i gjithë aktiviteti futbollistik për këtë javë është ndërprerë. Sytë dhe zemrat tona janë pranë familjeve që kanë humbur të dashurit e tyre dhe solidarizohemi me të lënduarit nga kjo ditë e vështirë. Sektori Garave në FSHF do të njoftojë në ditët në vazhdim datat e reja për këtë javë të spostuar”, njoftoi FSHF të martën.
Discussion about this post