Emine Erdoğan, bashkëshortja e Presidentit të Turqisë, Recep Tayyip Erdoğan, u ka dërguar një letër bashkëshorteve të liderëve botërorë, të cilëve u kërkon që të ndërgjegjësohen dhe të veprojnë për të ndihmuar ata që po përjetojnë tmerrin në Siri.
“Ajo çka po u ndodh atyre, është duke u zhvilluar përpara syve të komunitetit ndërkombëtar të mbështjellë nga heshtja dhe indiferenca, do të shënojë një njollë të zezë në historinë e njerëzimit, të ngjashme me atë që ndodhi në Bosnje.”, shkruan fillimisht Emine Erdoğan.
Në vijim të letrës të drejtuar këtyre bashkëshorteve të burrave të pushtetshëm, ajo shkruan se kjo është tragjedia më e madhe njerëzore e ndodhur gjatë pesë viteve të fundit ku janë vrarë më shumë se 600 mijë njerëz, 7 milionë janë larguar nga shtëpitë e tyre dhe 5 milionë kanë braktisur vendin.
“Si nënë, si grua, si njeri mbi të gjitha, iu paraqes këtë dramë njerëzore që po përjetohet në Siri. Është një periudhë ku të gjithë duhet të bëjmë më shumë se sa të derdhim lot për Sirinë. Uria, etja dhe ndihma mjekësore e privuar, shkaktojnë vdekje, me në krye gra dhe fëmijë. Kushdo që beson në të drejtat e njeriut dhe lirinë e çdo institucioni, iu bëj thirrje të marrë masa të menjëhershme për të mbrojtur të drejtën themeltare të jetës.”, u shpreh Zonja e Parë e Turqisë.
Emine Erdoğan e përfundon letrën e saj me këto fjalë: “Unë besoj se ju do të jepni kontributin tuaj lidhur me këtë çështje. Sigurisht, për të ndërtuar një botë të begatë dhe paqësore. Me këtë rast, në emër të partisë dhe vendit tim, shpreh urimet e mia të sinqerta dh uroj paqe dhe lumturi për të gjithë njerëzimin gjatë 2017-ës.” (XH.A/SHUPLAKA)
Discussion about this post