Gazetari i del në mbrojtje Nishanit: Pse presidenti veproi drejt me Xhafajn

Gazetari Denis Dyrnjaja i del në mbrojtje presidentit Bujar Nishani, pasi vendosi për të dekretuar vendimin për emërimin e të katër ministrave të propozuar nga kryeministri Rama, një prej tyre edhe Xhafaj, i akuzuar vazhdimisht se i ka shërbyer regjimit të Enver Hoxhës, si hetues për Sigurimin e Shtetit.

“Mes moralit dhe ligjit gjithmonë duhet të prevalojë ligji, sepse mbi moral mund të veprosh drejtë por edhe padrejtësisht. Diktatura tregoi se mbi bazën e moralit të shndërruar dhe justifikuar shpesh edhe me ligj u shtypën, pushkatuan dhe persekutuan mijëra vetë.

Përsëritja e të njëjtit gabim në formë dhe përmbajtje të ndryshme është edhe më e rëndë.”, shkruan dyrnjaja.
Ashtu si e kishte lajmëruar edhe dje Presidenti Nishani ka dekretuar ndryshimet e propozuara nga Rama në qeveri. Edhe pse emri i Xhafajt ka qenë gjerësisht i kontestuar edhe nga opozita dekretimi i tij ka qenë e vetmja zgjedhje pas saktësimit në Kushtetutë.

‘’Në vlerësimin tim kandidatura e ministrit të Brendshëm është e papërshtatshme. Por, Kushtetuta nuk ia jep të drejtën Presidentit të Republikës për të refuzuar një kandidaturë për ministër, pasi i vetmi kusht i cili përcakton Kushtetuta për të qenë ministër është ai i kritereve për të qenë deputet.

Në rast se Kushtetuta e vendit do t’ia njihte të drejtën Presidentit, për të refuzuar propozimet e Kryeministrit bazuar në arsyetime, unë  do ta refuzoja kandidaturën e ministrit të Brendshëm.

Në kushtet që Kushtetuta nuk ia njeh këtë drejtë Presidentit, unë besoj dhe shpresoj që ai institucion që Kushtetuta ia njeh këtë të drejtë për të vlerësuar kandidaturat për ministër që është Parlamenti i Shqipërisë, do të gjykojë dhe vlerësojë të gjitha rrethanat, situatën politike dhe specifikën që ka jeta shoqërore, publike e politike e vendit, që janë zgjedhjet e ardhshme politik’’, u shpreh dje Nishani.

Mirëpo gazetarë, por edhe politikanë u shprehën publikisht kundër këtij vendimi të Nishanit.

REAGIMI I DYRNJAJËS

Jetojmë në Demokraci me mendësi diktatoriale!

Në komunizëm njerëzit dënoheshin, denigroheshin dhe persekutoheshin në emër të moralit, moralit komunisto/proletar.

Sot po i kërkohet Presidentit pse nuk veproi në emër të moralit për rastin e Fatmir Xhafës, por veproi në bazë të ligjit. Ndër shqiptarë ka ndryshuar sistemi, por jo mendësia.

Njerëzit ende vijojnë të linçohen publikisht për biografi, reminishencë e së kaluarës diktatoriale!

Mes moralit dhe ligjit gjithmonë duhet të prevalojë ligji, sepse mbi moral mund të veprosh drejtë por edhe padrejtësisht. Diktatura tregoi se mbi bazën e moralit të shndërruar dhe justifikuar shpesh edhe me ligj u shtypën, pushkatuan dhe persekutuan mijëra vetë.

Përsëritja e të njëjtit gabim në formë dhe përmbajtje të ndryshme është edhe më e rëndë.

Presidenti reagoi siç duhej jo mbi bazën e emocioneve dhe opinionit personal por me ftohtësinë e ligjit dhe detyrës.

Presidenti veproi drejtë në këtë rast! (D.D/Shuplaka)