Vizita e përvitshme e pelegrinëve serbë në Gjakovë nuk ka shkuar siç duhet kësaj here. Një grup qytetarësh të Gjakovës janë mbledhur afër Kishës Ortodokse në shenjë kundërshtimi të vizitës së paralajmëruar të pelegrinëve serbë.
Mësohet se gjatë kësaj vizite, një grup qytetarësh gjakovarë kanë sulmuar me gurë autobusin e pelegrinëve serbë. Lajmi është konfirmuar për “Telegrafin” nga zëdhënësja e Policisë së Gjakovës, Lirie Podrimaj-Beqiraj.
“Po është e vërtetë është thyer një xham i autobusit dhe lidhur me këtë janë shoqëruar në stacioni policor pesë femra.”, është shprehur ajo.
Ajo ka shtuar se është ende duke u pritur vendimi i Prokurorit për masat që do të ndërmerren ndaj pesë femrave që janë shoqëruar në polici.
Një situatë e tillë e ngjashme ishte ajo e dy viteve më parë kur pelegrinët serbë u penguan të vizitojnë kishën për Krishtlindjet Ortodokse. Gjakova cilësohet si një nga rajonet që ka pësuar shumë dëme gjatë luftës së fundit ku ish–regjimi i Sllobodan Millosheviçit ka shkaktuar viktima dhe shkatërrime të shumta. (XH.A/SHUPLAKA)
Discussion about this post