Bashkia e Kukësit këtë vit me sa duket ka vendosur t’i japë fund problemit kronik të vaditjes. Mësohet se bordi i kullimit po punon për zhbllokimin e kanaleve vaditëse. Paralelisht me to po punohet edhe për hapjen e kanalit të vjetër të Shtiqnit, i lënë në harresë prej kohësh.
“Krahas punimeve që po kryhen në veprën më të madhe ujitëse në Qarkun e Kukësit, Kanalin e Uzinës, grupet e punës të ngritura nga Bordi i Kullimit po punojnë në kanalin e vjetër të Shtiqnit për pastrimin e të gjithë gjatësisë së tij nga shkurret e mbeturinat e ndryshme inerte.
Gjithashtu në Kalimash, në kanalin vaditës “Vija e Kolës” po punohet për rindërtimin e shtratit të kanalit dhe shtrirjen e tubacioneve për përcjelljen e ujit.
Kujtojmë që Kukësi edhe pse është një nga vendet me burimet më të shumta ujore në Shqipëri ka pasur probleme me ujin e pijshëm dhe vaditjen.
(B.H/SHUPLAKA)
