GJKKO ka lënë në masën e “Arrestit me burg” avokatin Alban Bengasit. Ai akuzohet se kishte paguar Nuredin Dumanin për vrasjen e gruas së tij.
Sot në seancë Bengasi ka mohuar të ketë lidhje me çfarë ka rrëfyer Nuredin Dumani. Ai e ka cilësuar si mashtrues bashkëpuntorin e drejtësisë, duke u shprehur se në asnjë moment nuk i është shmangur hetimit.
Mësohet se prokurori Behar Dibra kërkoi në seancë shpjegime nga Bengasi, pse u largua një javë pasi dolën masat e arrestit dhe pse u kthye në Shqipëri në momentin që dosja kaloi për gjykim.
Bengasi sqaroi se në çdo pozicion pune që ka mbajtur, nga OPGJ e deri tek avokat, e ka bërë më ndershmëri dhe pa asnjë kompromis.
Alban Bengasi u arrestua në aeroportin e Rinasit disa ditë më parë nga policia, teksa po hynte në Shqipëri. Ai gjendej në Dubai dhe ishte në kërkim ndërkombëtar nga Interpol Tirana.
Një javë më parë përfaqësuesit ligjor të Bengasit i dërguan një shkresë SPAK ku sqaronin se klienti i tyre ishte gati të vetëdorëzohej, vetëm të hiqej thirrja për kërkim ndërkombëtar, pasi Dubai dhe Shqipëria nuk kanë një marrëveshje ekstradimi.
Sipas rrëfimeve të Dumanit, Bengasi i ka kërkuar atij të vriste gruan e tij për motive xhelozie pasi ajo e tradhtonte me një shokun e tij.
