Janë dërguar në gjyq dy të akuzuar për gjobëvënien ndaj një emigranti. Pritet që të fillojë shqyrtimi gjyqësor ndaj shtetasve Nezir Bullaku, 48 vjeç, dhe Afrim Berisha, 29 vjeç, mbi të cilët rëndon akuza e shtrëngimit me anë të kanosjes për dhënie të pasurisë.
Ata akuzohen për ngjarjen e ndodhur në Shkurt të 2017-ës, ku në bashkëpunim me njëri-tjetrin kërcënonin emigrantin me iniciale E. R. se nëse nuk do i bindej, do i bënin keq familjes së tij apo dhe vetë atij. Ata u kapën në flagrancë teksa ishin takuar me emigrantin, të cilin deri në ato momente kishin mundur t’i merrnin vetëm 31 mijë euro.
Aksioni i policisë u zhvillua pasi emigranti me iniciale E.R. kishte shkuar në Policinë e Fierit dhe kishte bërë denoncim. Ai kishte deklaruar në polici se si pasojë e kërcënimeve detyrohej t’i gjente paratë edhe duke i marrë borxh për t’iu përgjigjur në kohë dy personave.
(XH.A/SHUPLAKA)
