Hidhet shorti, përzgjidhen 8 gjyqtarët që do kenë në dorë fatin e zgjedhjeve

Këshilli i Lartë i Drejtësisë përzgjodhi sot tetë gjyqtarët që do të përbëjnë Kolegjin Zgjedhor të Gjykatës së Apelit Tiranë.

Ata janë: Artur Malaj, Tomor Shkreli, Ridvan Hado, Shkëlqim Mustafa, Gjin Gjoni, Astrit Kalaja, Sotiraq Lubonja dhe Lindita Sinanaj.

Këta 8 gjyqtarë do kenë në dorë fatin e “zgjedhjeve” të 18 qershorit, të ankesave të partive, për zona apo kandidatë të ndryshëm.

Në shortin që u hodh nga Këshilli i Lartë i Drejtësisë për përzgjedhjen e tetë gjyqtarëve, u përfshinë emrat e 92 gjyqtarëve të të gjitha gjykatave të apelit të Republikës së Shqipërisë.

Por dy gjyqtarë u përjashtuan pak para nisjes së hedhjes së shortit, për shkak të moshës afër pensionit.

Të pranishëm gjatë hedhjes së shortit ishin përfaqësuesit e 5 partive parlamentare, ndërsa mungonin përfaqësues nga PR e PBDNJ-ja.