Pas një skandali për korrupsion, Parlamenti i Koresë së Jugut voton për shkarkimin e presidentes së vendit, Park Geun Hye.
Ky vendim u mor me 234 vota pro, ndërsa 56 vota kundër. Mes anëtarëve që votuan pro shkarkimit të presidentes, kishte edhe nga ata të partisë së saj.
Gjithsesi vendimi përfundimtar do të merret nga Gjykata kushtetuese, e cila brenda 30 ditësh duhet të vendosë nëse Park Guen Hye do të largohet përfundimisht apo do të kthehet sërish në detyrë.
Presidentja Park Guen Hye akuzohet për abuzim të detyrës dhe se ka ndihmuar shoqen e ngushtë Choi Soon-sil, e cila ndodhet nën arrest, për të marrë para nga kompanitë e Koresë së Jugut.
Pas këtij skandali, qytetarët janë ngritur në protesta masive për të kërkuar largimin e saj nga posti i presidentes.
Presidentja i ka mohuar të gjitha këto akuza, megjithatë menjëherë pas votimit për largimin e saj, ajo ka kërkuar falje për kaosin që është krijuar në vend. Madje ka pranuar se kjo ka ndodhur për shkak të pakujdesisë së saj.
