Kreu i Partisë Demokratike Lulzim Basha ka takuar sot Emergjencat e Bashkisë së Kukësit pas një udhëtimi te tij drejt këtij qyteti për të parë situatën në këto ditë të ftohta dimri.
Basha është shprehur se puna në kukës në këto ditë të vështira është për t’u lavdëruar, por ama thekson se bashkitë nuk kanë patur asnjë ndihmë nga qeveria.
Sipas kreut të opozitës, banorët po paguajnë dyfish për ngrohjen në këto ditë të ftohta dimri.
“Regjimi për drutë e zjarrit është ndëshkues. Kam qenë në kontakt me qytetarët dhe këshilltarët bashkiakë. Bashkitë nuk kanë pasur asnjë ndihmë nga qeveria qendrore, ia kanë dalë të vetme. Puna në Kukës është për t’u lavdëruar. Këto janë ditë të vështira, me mungesë energjie. Ngrohja dhe drutë e zjarrit, është një problematikë e ngritur nga qytetarë të djathtë dhe të majtë. Kamionët e qeverisë ngarkohen me dru, ndërsa qytetarët ndëshkohen për shkurre. Situata është e renduar në të gjithë vendin. Çmimi i latave në Korçë, Ersekë, Përrenjas, Dibër, Kukës, Has, Tropojë, Malësi e Madhe, Dukagjin, Shkodër, është e dyfishuar. E njëjta situatë në Kukës. Qytetarët paguajnë dyfish për ngrohje nga 20 mijë, 40 mijë. Në Korçë nga 35-70. Dy probleme madhore janë ngritja e çmimit të druve dhe mungesa e energjisë”, tha Basha.
Nga Kukësi, Basha i ka bërë thirrje kryeministrit Rama që të shohë gjendjen në terren dhe të shpallë gjendjen e emergjencës.
Sakaq, kreu i opozitës i bëri thirrje kryeministrit që të dalë në terren dhe t’u vijë në ndihmë banorëve të izoluar nga errësira për shkak të mungesës së energjisë.
“Kryeministri të shohë gjendjen në terren. Banorët janë të izoluar dhe në errësirë. Kërkoj një angazhim më të madh nga ana juaj dhe qeveria. Por Qeveria nuk e merr përsipër emergjencën. Shpreh mirënjohjen më të thellë dhe keqardhjen për punonjësit e OSHEE, të cilët punojnë në kushte ku shpëtohen nga banorët në situatë të vështirë, ku nuk është investuar këto 3 vjet. Qeveria ia ka pasuar bashkive këto problematika. Por pushteti vendor ka pasur 0 asistencë nga qeveria. Evidentoni çdo familje në nevojë. Pasi 46% prej tyre janë në varfëri ekstreme. Qeveria të kthejë sytë këtej, sepse emergjenca nuk ka kaluar. Kjo është gjendje emergjence, dhe qeveria nuk e shpall. I lënë punonjësit e OSHEE të ngrijnë nëpër shtylla”, ishin fjalët e Bashës. (D.D/Shuplaka)
