IDENTITET/ “Historia e një qyteti të ndërtuar mbi gurë”, Gjirokastra e Argjiros, tradicionales dhe njerëzve mikpritës

“Historia e një qyteti të ndërtuar mbi gurë!”

Moderatorja dhe gazetarja Aida Shtino, në emisionin “Identitet”, ka sjellë në ekranin e FaxNews qytetin e gurtë të Gjirokastrës.

Me rrugët e kalldrëmta, banesat e paarritshme, ku ndërthuret stili oriental me atë perëndimor. Me Kështjellën e Argjiros, gatimet tradicionale dhe sigurisht, mikpritjen e vendasve, kështu paraqitet ky qytet i lashtë.

Data e ndërtimit të Kalasë së Gjirokastrës është e paqartë, megjithatë historia e saj prek disa epoka.

Në Kala, përveç mureve të lartë, ndodhet dhe Kulla e Sahatit, nga ku pamja është mbreslënëse.

Atraksionet e veçanta janë të shumta në Gjirokastër, gjë që ka bërë dhe ardhjen e qindrave turistëve në muaj.

Kryebashkiaku i Gjirokastrës, Flamur Golemi ka treguar mbi zhvillimet e viteve të fundit që janë ndërmarrë në të gjithë zonën. Golemi është shprehur që një nga problematikat kryesore janë pronësimet, banesa të cilat kanë disa pronarë. Një pjesë të lëna pas dorë nga pronarët e larguar, megjithatë kryebashkiaku tregon që është duke u punuar për të gjetur një zgjidhje.

Sakaq, turizmi i shumëfishuar dhe investimet e bëra, nuk kanë munguar na tregon Golemi, sikurse janë shtuar bujtinat dhe shtëpizat akomoduese.

Flamur Golemi: Unë si profesion jam mjek. Në 2017 u bëra pjesë e politikës, por nuk më ngjiti Tirana.

Mbartëm shumë probleme, por më vjen mirë që ka shumë ndryshim. Në mars kemi pasur 6 mijë turistë. Ka turistë nga e gjithë bota. Nuk mund të ngelesh pa ardhur në Gjirokastër, nëse vjen në Shqipëri. Para 5 vitesh, banesat akomoduese kanë qenë shumë pak, gjë që ka ndryshuar pasi janë hapur bujtina dhe shtëpiza.

Vitet e fundit nuk janë lejuar ndërtimet, jashtë strukturës së stilit tradicional që e karakterizon Gjorkastrën. Një nga problemet aktuale janë pronësimi i shtëpive. Ka shumë shtëpi me disa pronarë, të cilët me kalimin e viteve shtohen. Është një suport shumë i madh dhe me Ministrinë e Kulturës. Vlera e pronave të braktisura është 10-fishuar.

Me rrugën e bërë, Gjirokastra ka edhe det.

Qyteti i Gjirokastrës shquhet për artizanët që kanë lënë gjurmë në çdo cep të tij, në shtëpitë, në veshjet, në punimet e dorës. Jo një gjë e rastësishme, ka treguar një nga artizanët, pasi kjo vjen prej një kulture të trashëguar në breza.

Për turizmin, artizanët në Gjirokastër kanë dhënë një kontribut të madh nëpërmjet ruajtjes së traditës.