Lulzim Basha nga foltorja e Kuvendit ka hedhur sot akuza të forta në drejtim të ministrave dhe ish-ministrave të qeverisë.
Duke iu referuar koncesioneve në fushën e mjekësisë, Basha iu drejtua Ilir Beqajt me fjalët se vetë ai e di se ku do të shkojë.
“Ilir Beqja ti e di se ku do shkosh. Pusho Sadri të gjithë e dinë hallin tënd, mos u bëj zëdhënës i të tjerëve. Janë shtuar ndërtimet e pallateve në vendin tonë, po nuk është rritur numri i kredive, me çfarë po bëhen këto ndërtime?! Me lekët e pista dhe paratë e drogës”, u shpreh Basha.
Po ashtu më herët Basha i ka kujtuar Blendi Klosit çështjen e Durim Keçit, ndërsa Gjiknurit i tha se për sa kohë do të mund ta blejë lirinë.
“Sot ka vetëm një partner të besueshëm, vetëm një forcë politike që nuk i shtriu dorën krimit, që nuk solli kriminelë në Parlament, që nuk çon ministrat me vrap te Durim Keçi (i drejtohet Blendi Klosit) sa herë arrestohet. Apo ishte Vangjushi (Dako)? Më fal. Çove Vangjushin. Ty nuk ta mbajti (i drejtohet sërish Klosit). Apo çon ministra të tjerë nëpër hotelet rajonale me krerët e bandave. Ti pse qesh (i drejtohet Damian Gjiknurit)? Të të përmend edhe ty? Ti mund ta blesh për një javë, për dy javë, për një muaj lirinë, por e di se çfarë të pret”, u shpreh kreu i PD-së.
(E.K/FAXWEB)
Discussion about this post