Ndryshimet kushtetuese, reagon për herë të parë Meta: T’i jepet fund kësaj marrëzie, është haptas antikushtetues dhe antiligjor

Presidenti Ilir Meta ka reaguar për herë të parë pasi komisioni i Ligjeve ka miratur me dakordësinë e mazhorancës dhe opozitës parlamentare ndryshimet në Kushtetutë, ku do të sanksionohen listat e hapura dhe praktikisht heqja e koalicioneve parazgjedhore. (LEXO KËTU)

Me anë të një postimi në mediat sociale të zëdhënësit të tij Tedi Blushi, Presidenti thekson se Kuvendi aktual ka vetëm 82 deputetë legjitimë, ku përfshihen edhe tre deputetët të cilët nuk pranuan të dorëhiqeshin pas vendimit të Opozitës së Bashkuar.

Sipas Metës “182 deputetë dhe kandidatë për deputetë të partive opozitare refuzuan të ishin pjesë e Kuvendit. Edhe pse shteruan të gjitha listat e partive opozitare prej 18 muajsh, Kuvendi ka formalisht vetëm 122 deputetë nga 140 deputetë që është detyrimi kushtetues.”

Meta thekson se “procesi i zëvendësimit ka qenë haptas antikushtetues dhe antiligjor. Ndaj është koha t’i jepet fund çdo marrëzie, fundi i së cilës dihet qartë. E ardhmja europiane e Shqipërisë është alternativa e vetme e të gjithë qytetarëve të këtij vendi. Të gjithë të distancohen nga aventurierët dhe Haxhi Qamilët! SHQIPËRIA E PARA! ?? SHQIPËRIA SI GJITHË EUROPA!”