IN MEMORIAM/ Anita Take një jetë në skenë, zëri i ëmbël që u këndoi shqiptarëve

Këtë mbrëmje u nda nga jeta këngëtarja e njohur e muzikës shqiptare, Anita Take. Me zërin e saj, për 50 vite me radhë Anita ka prekur zemrat e publikut shqiptar.

Këngëtarja e madhe ka lënë gjurmë të thella në historikun e muzikës dhe të këngës shqiptare dhe për këtë arsye nuk do të largohet kurrë nga kujtesa e publikut.

Hapat e para në muzikë:

Anita Take u ngjit në skenë para 50-vjetësh, por vazhdon të kujtohet me nostalgji nga të gjithë ata që e kanë ndjekur karrierën e saj artistike.  

Ajo ka lindur në një familje që nuk merrej me muzikë, megjithatë e mbështetën pasionin e madh të së bijës. Megjithatë, në një intervistë të para disa viteve, këngëtarja ka treguar se i ati ka patur një vegël frymore, që i binte në shoqërinë “Vatra” në Amerikë, ku ai kishte emigruar. Ndërsa e ëma e saj këndonte bukur pavarësisht se ajo nuk ishte vetë këngëtare. Ka qenë pikërisht mbështetja e mamasë që e ka shtyrë Anitën më shumë drejt muzikës.

Për herë të parë Anita Taka është ngjitur në skenë në vitin 1949. Në atë kohë, ajo punonte si amatore në Shtëpinë e Oficerave, pasi nuk kishte skena ku këngëtarët të dalin lirshëm siç bëjnë sot.

Njohja me Agim Prodanin:

Muzika, pasioni i tyre i përbashkët, ka qenë ajo që e ka njohur Anita Takën me Agim Prodanin, i cili përveçse ka kompozuar një pjesë të mirë të këngëve të saj, u bë edhe personi me të cilin këngëtarja vendosi të kalonte jetën.

“Më ka ndihmuar shumë. Ndaj, për këtë unë falenderoj shumë profesionin tim, i cili më njohu me njeriun, që më ka ndihmuar dhe më ka përkrahur pa masë në rrugën time artistike. Ai gjatë gjithë jetës sime mbeti për mua, jo vetëm një bashkëshort i mirë, por edhe një shok dhe koleg shumë i mirë.”, ka deklaruar para disa vitesh Anita.

Për kontributin e saj në muzikë, Anita Taka është dekoruar nga presidenti me titullin e lartë: “Naim Frashëri i Artë”. Taka nërroi jetë sot në moshën në moshën 83-vjeçare. Ajo ka lënë pas dy djem, Kujtim dhe Florian Prodani, i pari kompozitor dhe kantautor ndërsa i dyti ka mbaruar inxhinieri ndërtimi dhe informatikë, por vazhdon t’i bjerë pianos. (D.D/Shuplaka)