Presidenti i Republikës, Ilir Meta i ka kthyer përgjigje liderit suprem të Iranit, Ali Khamenei, i cili e quajti vendin tonë djallëzor që ka bashkëpunuar me SHBA kundër iranianëve.
Në një postim në “Facebook”, Meta ka deklaruar se Shqipëria është një vend demokratik që qëndron krah Shteteve të Bashkuara të Amerikës për të garantuar stabilitetin dhe paqen në botë.
“Shqipëria nuk është një vend djallëzor, por një vend demokratik që ka vuajtur nga një diktaturë djallëzore e pashembullt, ndaj të drejtat e njeriut i ka të shenjta.
Prej dy dekadash Shqipëria mbetet e vendosur në angazhimet e saj përkrah SHBA dhe vendeve të NATO-s në luftën kundër terrorizmit ndërkombëtar dhe çdo akti që vë në rrezik stabilitetin dhe paqen në botë”, u shpreh Meta.
Kreu i shtetit komentoi edhe sulmin e kësaj të mërkure të Iranit ndaj bazave amerikane. Ai i bëri thirrje Iranit që të mos provokojë, por të respektojë marrëveshjet ndërkombëtare.
“Raketat e lëshuara nga Irani drejt dy bazave ushtarake irakiane që strehojnë ushtarakë amerikanë dhe personel të koalicionit, janë një veprim provokues me pasoja të rrezikshme për rajonin dhe stabilitetin e tij. Irani duhet të respektojë marrëveshjet ndërkombëtare, ligjet ndërkombetare dhe detyrimet e tyre në interes të paqes”, tha Ilir Meta.
Discussion about this post