Vrasja e gjyqtares Fildez Hafizi të enjten e kaluar, ka shokuar mbarë opinionin publik. Çështja vazhdon ende të diskutohet, pasi vrasja e saj dëshmoi defektet në sistemin tonë të drejtësisë.
Ish-ministri Teknik i Drejtësisë, Gazmend Bardhi, i cili mbrëmjen e sotme ishte i ftuar në “Tonight Ilva Tare”, tha se Fadil Kasemi, përfitoi nga amnistia në dhjetor të vitit të shkuar duke u liruar nga burgu.
Sipas Bardhit, personat që kanë kryer dënimet për dhunë në familje nuk i kanë përsëritur më veprat penale. Ish-ministri sqaroi edhe situatën e dhënies së amnistisë për Kasemin.
“Aktualisht, zotëria në momentin kur është miratuar ligji për amnistinë, i katërti në katër vite gjë që nuk kishte ndodhur prej 20 e kusur vitesh. Amnistitë janë dhënë një herë në 5 vite.
Në momentin e amnistisë, zotërisë i kishin ngelur edhe 11 muaj dhe 8 ditë për të qëndruar në burg.
Sipas nenit 5 të ligjit të amnistisë që futej për herë të parë, thuhej që pavarësisht nga fakti që një person përfshihej në kritere ndaluese, nëse i kanë ngelur një vit nga dënimi kur ishte burrë dhe dy vite kur ishte grua, pavarësisht nga vepra penale, për vrasje, trafik droge, dhunë në familje, çdo person që ishte në burg.
Pavarësisht thotë neni 5 që mund të jesh në kriteret ndaluese, përfiton. Në rastin konkret që je tek ndaluesit, nuk e përfiton, por rast që ke edhe 1 vit burg përfiton. Nga 2012, deri në 2017 ka një rritje të vazhdueshme të personave që dënohen për krime në familje. Personat që kanë kryer dënimin, nuk kanë kryer më vepra penale që tregon se ka funksionuar.”, është shprehur sot ish-ministri. (D.D/Shuplaka)
