Ish-ministri i Financave Arben Malaj, ka dhënë alarmin se një skemë e re mashtruese rrezikon investitorët dhe depozituesve shqiptarë. Sipas Malajt, 88 % e investitorëve do të humbasin paratë në “Bitcoin”.
“Rreziku i një skeme mashtruese po i kanoset investitorëve dhe depozituesve të vegjël shqiptarë. Bitcoin, monedha virtuale, po prezantohet si një mundësi e jashtëzakonshme fitimi. Si në çdo skemë mashtruese rreth 88% e tyre do të rezultojnë humbës të parave të tyre dhe vetëm 12 % mund të fitojnë”, shprehet Malaj në një prononcim për TV Klan.
Sipas ish-ministrit, parimi bazë i këtyre skemave mashtruese është joshja nga fitime të larta dhe psikologjia e ‘turmës’.
“Në fakt në rastin e këtyre krizave të panikut, të gjithë shesin në panik. Në këto momente nuk ka blerës. Kur oferta rritet dhe kërkesa është e ulët, çmimi bie ndjeshëm, vlera e mbetur e monedhave ‘Bitcoin’ është e vogël dhe humbjet janë më të rënda”, thekson Malaj.
Vetë Banka Qendrore Europiane njoftoi disa ditë më parë se volume i përdorimit në tregje të Bitcoi ka arritur në 289 milion dollarë duke kaluar edhe disa agjenci të licesuara për kryerjen e pagesave nga autoritetet monetare. Deri tani askush nga institucionet mbikëqyrëse në Shqipëri nuk ka reaguar, si Autoriteti i Mbikëqyrjes Financiare, si Banka e Shqipërisë për të bërë një deklaratë në mbrojtje të depozituesve. (D.D/Shuplaka)
Discussion about this post