Një atentat me armë zjarri është shënuar në orët e para të mëngjesit në Shijak. Për pasojë ka mbetur i plagosur shtetasi S.Gj 42-vjeç.
Sipas policisë, “më datë 05.01.2017, rreth orës 02:20, në lagjen “Ballias”, Shijak, e kanë qëlluar me armë zjarri në rrugë, rreth 30-40 m pa shkuar në banesë, shtetasin S.Gj. 42 vjeç, i cili është plagosur lehtë në dorë (pjesën e parakrahut).
Shtetasi S.Gj. ka qenë duke u kthyer në banesë me mjetin e tij, tip “Range Rover” me targa AA 580 MS”.
Pas plagosjes, i dëmtuari ka marrë mjekim në Spitalin Rajonal Durrës dhe më pas është larguar për në banesë.
Me të marrë njoftimin menjëherë në vendngjarje kanë shkuar efektivët e Policisë, të cilët kanë këqyrur vendin e ngjarjes, mbledhur provat materiale me qëllim identifikimin dhe kapjen e autorëve. Gjatë këqyrjes së vendit të ngjarjes janë gjetur disa gëzhoja të kalibrit 9 mm.
Nga burimet policore, mësohet se 42-vjeçari ka qenë i dënuar me 7 vjet burgim për veprën penale “Trafikim të lëndëve narkotike”, dhe është liruar në vitin 2012.
Specialistët për Hetimin e Krimeve të Rënda në Policinë e Durrësit po vijojnë hetimet për zbardhjen dhe dokumentimin e plotë të ngjarjes.
