Ismail Kadare nominohet për çmimin ‘EBRD 2018’, në garë dhe nobelisti Orhan Pamuk

Shkrimtari  i madh Ismail Kadare është nominuar për çmimin e letërsisë EBRD 2018, që mbahet për të promovuar krijimtarinë e vendeve në zhvillim.

Nga 12 autorë juria ka përzgjedhur 6 romane të cilat konsiderohen prej saj “të jashtëzakonshme”.

Kadare është nominuar për veprën e tij “Kamarja e Turpit”. Në garë me shkrimtarin shqiptarë janë autorë të njohur si Andrey Kurkov, Boris Akunin, Daša Drndić, Alaëiya Sobh, por edhe nobelisti Orhan Pamuk me librin “Gruaja me flokë të kuqe”.

Romani Kadaresë “Kamarja e turpit”, në anglisht mban titullin “The Traitor’s Niche” është përkthyer nga John Hodgson dhe është botuar nga shtëpia botuese “Penguin” në Londër. 

Dhënia e këtij çmimi është një nismë e filluar në vitin 2017 nga Banka Europiane me vendet partnere në zhvillim dhe me Këshillin Britanik, si dhe me Panairin e Librit në Londër. 

“Vlera prej € 20,000, çmimi ofron një mundësi unike për të reflektuar kulturën dhe kreativitetin e pothuajse 40 vendeve ku investon Banka jonë, nga Maroku në Mongoli, nga Estonia në Egjipt. Çmimi do t’i jepet veprës më të mirë letrare të përkthyer nga gjuha origjinale në anglisht dhe botuar në Mbretërinë e Bashkuar në harkun kohor të 18 muajve deri më 15 nëntor 2017″, thuhet në një deklaratë për mediat. 

Vlera € 20,000 do të ndahet në mënyrë të barabartë ndërmjet autorit dhe përkthyesit. Ky shpërblim mbron mjeshtërinë e përkthimit dhe pasurinë krijuese në vendet e rajonit, deklarojnë organizatorët. Fituesi i këtij çmimi do të shpallet më 10 prill të këtij viti.

(B.H/Faxweb)