Iu premtuan 4 personave kalim kufiri në këmbim të parave, policia arreston 2 shtetas të dënuar më parë

Policia e Pogradecit ka arrestuar dy persona, të cilët akuzohen se kanë tentuar të kalojnë në kufi në këmbim të parave katër shtetas të huaj.

Ata janë kapur në rrugën nacionale Pogradec-Qafë-Thanë në tentativë për të finalizuar planin e tyre.

Sipas policisë, ata ju kishin kërkuar shtetasve të huaj nga 150 euro secilit për të kaluar kufirin. Që të dy të arrestuarit rezultojnë të dënuar më herët

Njoftimi i plotë i policisë:

Operacioni i zhvilluar pas një hetimi disa mujor, për goditjen e veprimtarisë kriminale në fushën e dhënies së ndihmës shtetasve të huaj, për kalim të paligjshëm të kufirit kundrejt fitimit. Arrestohen në flagrancë 2 shtetas me precedent të mëparshëm penal, pasi u kapën duke transportuar shtetas të huaj.

Specialistët e Seksionit për Trafiqet e Paligjshme në DVP-Korçë, në bashkëpunim me shërbimet e Forcave Lëvizëse Operacionale, Komisariatin e Policisë Pogradec dhe Stacionin e Policisë Kufitare Pogradec, pas një hetimi disa mujor, finalizuan me sukses operacionin e koduar “Përsëritësi”, si rezultat i të cilit u bë kapja dhe arrestimi në flagrancë i shtetasve:

• E. T., 42 vjeç, banues në Tiranë (i dënuar më parë për veprat penale “Prodhimi dhe mbajtja pa leje e armëve luftarake dhe municionit” dhe “Ndihma për kalim të paligjshëm të kufijve”).
• F. L., 41 vjeç, banues në Linzë, Tiranë, (i dënuar më parë për veprat penale “Vrasja me dashje e mbetur në tentativë” dhe “Prodhimi dhe mbajtja pa leje e armëve luftarake dhe municionit”).

Shtetasit e mësipërm, janë kapur nga shërbimet e Policisë, në rrugën nacionale Pogradec-Qafë Thanë, duke transportuar me mjetet tip “Benz” dhe “Peugeot”, 4 shtetas të huaj, të cilëve iu kishin premtuar kalimin dhe transportimin e tyre drejt vendeve të BE-së, kundrejt fitimit prej 150 euro secilit.

Materialet i kaluan Prokurorisë pranë Gjykatës së Shkallës së Parë Pogradec për veprën penale “Ndihma për kalim të paligjshëm të kufijve, kryer në bashkëpunim”.