Jakup Krasniqi ia bën të qartë Ramës: Kufijtë e Kosovës nuk ndryshohen e as ricaktohen

Pas ish-kreut të Vetëvendosjes Albin Kurti, një tjetër zyrtar kosovar i është përgjigjur kryeministrit Edi Rama lidhur me kufijtë e Kosovës.

Këtë radhë është kryetari i Këshillit Kombëtar të Nismës, Jakup Krasniqi, i cili shprehet se kufijtë e Kosovës nuk ndryshohen e ripërcaktohen me opinione.

“Le ta dinë të gjithë, Presidentë e Kryeministra. Le ta dinë Presidentë a Kryeministra se shteti i Kosovës as nuk është bërë e as zhbëhet me deklarata e opinione.

Gjithashtu duhet ta dinë, se as kufijtë e Kosovës nuk ndryshohen e as ricaktohen me deklarata e opinione. Edhe për shtetin edhe për kufinjtë ka vendosur populli që i ka mbrojtur. I falenderojmë të gjithë ata që janë solidarizuar me të drejtat e liritë e popullit tonë në kohë të vështira!”, reagon Krasniqi.

Kjo deklaratë vjen fill pas debatit Kurti-Rama për demarkacionin e Kosovës me Malin e Zi. Kujtojmë se Kurti u shpreh kundër përpjekjeve të Ramës për të bindur kryeministrin e Kosovës Ramush Haradinaj për të ndryshuar qëndrim lidhur me demarkacionin me Malin e Zi.

Por edhe reagimi i Ramës nuk vonoi shumë pasi ai shkroi: “I dashur Albin! Faktet s’janë opinione dhe kufijtë nuk përcaktohen me opinione! Sa për tokën po ta kujtoj që unë nuk fal as det jo më tokë” (D.D/Shuplaka)