Policia e Durrësit zhvilloi dje aksionin e quajtur ‘’çiklsiti’’, ku u arrestuan 6 persona 3 prej të cilëve u mbajtën në burg, Florian Likmeta, 41 vjeç, Detar Rama, 24 vjeç, Erti Bllaca, 31 vjeç, banues në Durrës. Ndërsa tre të tjerët do të procedohen në gjendje të lirë, S.Zh., 23 vjeç dhe E.M., 22 vjeç, banues në Durrës, si dhe G.R., 20 vjeç, banues në Tiranë.
Të arrestuarit, dozat e lëndëve narkotike, kokainën dhe kanabisin e fshihnin në një pjesë të biçikletës (pjesën e pasme) dhe më pas i shpërndanin. Mjeti që përdornin ishte biçikleta ose motor, me qëllim që të mos identifikoheshin që po kryenin veprimtari të jashtëligjshme. Mësohet se klientët e tyre ishin frekuentuesit e klubeve në zonën e Vollgës, Currilave, Plazhit, në qendër të Durrësit etj.
Burime të grupit hetimor thonë se klientë të grupit të shpërndarjes së kokainës ishin edhe disa italianë, funksionarë të organizatave të ndryshme në Shqipëri, por edhe marinarë të shteteve të tjera që zbrisnin për pushim në Durrës. Sipas Policisë, Florian Likmeta ka qenë i arrestuar në vitin 2014 po për të njëjtën vepër penale (shpërndarës kokaine) dhe gjatë kësaj periudhe ka qenë në lirim me kusht.
Ai u prangos në korrik të 2 viteve më parë bashkë me të vëllanë dhe një person tjetër, ndërsa kishte me vete 26 doza kokainë gati për shitje, si dhe 100 gramë kokainë që do ta përgatisnin për ta shpërndarë në lagjet e qytetit. Aktualisht, policia po punon për identifikimin e personave të tjerë në këtë grup kriminal të mirëstrukturuar në fushën e narkotrafikut. (E.K/ SHUPLAKA)
