Për herë të parë pas vendosjes së Agron Malajt si kandidat për Bashkinë e Matit, kryeministri Edi Rama ka rrëfyer dhe arsyet e këtij vendimi, ku është ricikluar gardisti i 21 Janarit.
Duke iu përgjigjur pyetjes së gazetares së Fax news, Rama tha se Malaj vërtetë ka qenë pjesë e grupit të zjarrit në 21 Janar, ama ai nuk ka qëlluar mbi turmën.
Kryeministri vijoi më tej duke thënë se ai kishte kryer të gjitha verifikimet, dhe Malaj është një nga gardistët që ka hedhur më së shumti dritë mbi atë që ndodhi në 21 Janar, ku mbetën të vrarë 4 protestues të PS-së.
Gazetarja e Fax News, Ambrozia Meta: Pse ke vendosur në Mat, gardistin e 21 Janarit, që u shkarkua nga Saimir Tahiri, pasi ishte pjesë e grupit të zjarrit?
Rama: Shumë faleminderit për pyetjen, se e vërteta është që Agron Malaj ka qenë pjesë e gardës së republikës, ka qenë pjesë e grupit, po është e provuar katërcipërisht që nuk ka marrë pjesë në asnjë moment, në asnjë shkelje të ligjit.
Juve që merreni me informacionin keni të gjithë të drejtën por edhe detyrën, që para se ti vendosni njerëzit në një kornizë shabllon, unë i kam bërë verifikimet e mia. Është e vërtetë që është larguar, për ti dhënë mundësi transparencës për të gjithë procesin, po bëhet shumë propagandë me këtë.
Në cilën sferë të imagjinatës mund të shkoja unë që të pranoja në lidershipin tonë lokal, një person që do të ishte fajtor qoftë edhe moralisht për 21 Janarin. Ai ka informuar imtësisht për atë që ka ndodhur.
(E.K/FAXWEB.AL)
Discussion about this post