Pas akuzave të Partisë Demokratike, përmes sekretares për Marrëdhëniet me Publikun, Grida Duma, se kryetari i Bashkisë së Tiranës Erion Veliaj ka udhëtuar në Paris dy ditë më parë në mënyrë të fshehtë dhe me charter privat, ka reaguar Bashkia e Tiranës.
Sipas këtij institucioni, Veliaj më datë 16 janar ka qenë në Tiranë dhe ka marrë pjesë në disa aktivitete. Për të mbështetur këtë fakt, Bashkia ka dërguar pamjet e disa televizioneve që pasqyruan pamjet e aktivitetit të kryebashkiakut.
Por nuk ka mbetur pa reaguar as drejtori i Komunikimit në Bashkinë e Tiranës, Renato Kalemi.
Pasi ka shpërndarë lajmin e reagimit të kryebashkiakut Erion Veliaj, ai ironizon me PD-në duke shkruar: “Guidë: Si të bëhesh një parti qesharake, 6 muaj para zgjedhjeve”.
Sipas Partisë Demokratike, “dy ditë më parë, të hënën, në orën 9 e 20 të mengjesit është ulur në Rinas një avion çarter i kompanisë AVCON-JET. 40 minuta më pas, ky avion është rinisur për në Paris, dhe në bord ishin 3 pilotë, Erjon Veliaj, Arbër Mazniku, Juli Dhamo dhe biznesmeni që erdhi, i mori e i shoqëroi në Paris, Artan Sheqeri”. (A.R/SHUPLAKA)
