Nga Tritan Shehu –
Kjo shprehje e njohur, megjithëse tingëllon si cinike, fatkeqësisht konfirmohet jo rrallë e aq më keq edhe nga ata që duhet të “ndriçojnë” këtë komb, përfshi deputetët.
Një deputet i Kosovës, me papërgjegjmërinë më të madhe, kërkon të hedhë në “koshin e plehrave” figurën më të ndritur të historisë sonë, veprën dhe luftën e tij për liri, vlera e perëndimit, Gjergj Kastrioti Skënderbeu.
Së paku për një servilizëm të pakufi ndaj një personaliteti e një vendi mik, ai kërkon të çbëjë historinë, të shkelë krenarinë tonë, të çrrënjosë simbolet tona, të transformoje identitetin tonë.
Turqia është një vend mik e partner shumë i rëndësishëm për ne sot, faktor stabiliteti jo vetëm për Rajonin, por kjo nuk ka lidhje me faktin që Perandoria Osmane ka pushtuar e mbajtur forcërisht nën okupim shqiptarëet deri më 1912, kur mbas shumë luftrash e përpjekjesh u çliruam.
Ne sot kemi partner strategjik thelbësor Italinë, marrëdhënie të shkelqyera me Gjermaninë, por kjo nuk mund të na bëjë të mohojmë se fashizmi e nazizmi pushtuan vendin tonë dhe as të vemë në dyshim luftën e madhe që ne zhvilluam kundër tyre.
Që prej shekullit të XIV-të, në të gjitha luftërat dhe përpjekjet tona për liri, identitet, vlera, Europë. ne na ka frymëzuar ajo çfarë bëri për këto troje e popull Skënderbeu me flamurin e tij, që dje kishte përvjetorin e vdekjes.
Për shkaqe të ndryshme në historinë tonë ne gjejmë shumë pak personalitete e vlera me dimensione botërore e universale si Gjergj Kastrioti dhe Nënë Tereza.
Ti mbrojmë me fanatizëm e realizëm këto, se vetëm kështu lartësojmë veten dhe forcojmë pozicionet në familjen tonë. (A.R/SHUPLAKA)
Discussion about this post