Ish-deputeti socialist i Vlorës, Koço Kokëdhima, vijon me turin e tij të takimeve me socialistë brenda dhe jashtë vendit. Këtë herë i ashtuquajturi “Beu i Jugut” ka qenë në Athinë ku është takuar me emigrantë shqiptarë.
Gjatë takimit, Kokëdhima ka folur edhe për lëvizjen politike që ka nisur brenda Partisë Socialiste. Sipas tij, reformimi i PS-së do të bëhet nga baza.
Në fjalën e tij, Kokëdhima bëri të ditur se në janar 2017 do të nisë nënshkrimi i peticionit “Unë e zgjedh deputetin që dua”. Ai tha se kjo nuk është lëvizje individuale, por për t’u kthyer të drejtat qytetarëve.
“Në janar do të fillojmë nënshkrimin e peticionit: Unë zgjedh deputetin që dua! Ky peticion do të synojë që të vërë në lëvizje parlamentin dhe Partinë Socialiste për të garantuar me ligj të drejtën e bazës, të zgjedhë kandidatët për deputetë, kandidatët për kryetarë bashkie e për këshilltarë, përmes primareve ose zgjedhjeve paraprake, siç quhet ndryshe”, tha Kokëdhima
Ai u shpreh se nuk do të largohet nga Partia Socialiste, por do të punojë aty me anëtarët e thjeshtë të saj.
Në maj këtij viti Gjykata Kushtetuese i hoqi mandatin Koço Kokëdhimës. Parlamenti e dorëzoi kërkesën për papajtueshmërinë ose jo të mandatit të Kokëdhimës pasi Gjykata Kushtetuese e detyroi me një vendim paraprak. Ai akuzohej se kishte përfituar 150 tendera gjatë kohës që ishte deputet, gjë që është shkelje e ligjit.
Që prej atij momenti marrëdhëniet e tij me Edi Ramën janë ftohur së tepërmi. /A.R/
Discussion about this post