Shumë nga mbështetësit e lëvizjes “Sfida për Shqipërinë tjetër” u mblodhën sot përpara Komisionit Qendror të Zgjedhjeve për të kërkuar largimin e të gjithë kandidatëve në parlamentin e 2017, të dënuar penalisht.
“Sfida” beson që historia e parlamentit me persona të dënuar duhet të mbarojë. Në deklaratën për mediat përpara KQZ-së, Bojaxhi theksoi rëndësinë e largimit të personave të inkriminuar dhe zëvendësimin e tyre me individë përfaqësues, për të shmangur “parlamentin e të fortëve” apo “dhunuesit e ligjit”.
“Ne në parlament duhet të dërgojmë qytetarin model. Politika nuk bazohet vetëm mbi ligjin por edhe mbi moralin para qyetatarëve. Partitë tradicionale duan të na sjellin në parlamentin e ri akoma individe të dënuar për kontrabandë, korrupsion, dhunë apo vepra të tjera penale. Kemi jo pak por 27 kandidatë të dënuar me vendim gjykate. Një pjesë e kandidatëve madje kanë shkruar në formularin e kandidimit që janë të dënuar dhe sërish partitë politike kanë preferuar t’i vendosin në listat e tyre si parlamentarët e ardhshëm. Është një turp për partitë politike që nuk i kanë tërhequr tashmë kandidatët, madje kanë futur kokën si struci në rërë përballë kandidatëve të dënuar.
Kjo është pasojë e zgjedhjeve të kandidatëve nga kryetari i partisë që cakton për intersa elektorale se cilin “të fortë” do të vendosë në lista për ca vota më tepër. Ftojmë të gjithë partitë politike që të tërheqin këta kandidate duke i zevëndësuar më individë që përfaqësojnë qytetarin model si nga ana ligjore ashtu edhe nga ana intelektuale. Ne nuk mund të kemi më një parlament të fortësh apo dhunuesish të ligjit. Kjo politikë duhet të marrë fundit.”
Përfaqësuesit e “Sfidës” i kërkuan gjithashtu KQZ-së që nëse ka dyshime për firma apo dokumentacion të falsifikuar nga disa parti politike në mënyrë që të rregjistroheshin në zgjedhjet e ardhshme duhet të ketë një verifikim të imtësishëm pasi nuk mund të fillojmë një tjetër sezon parlamentar ku ka formacione politike që thyejnë ligjet për të bërë ligje. Ftojmë të gjithë gazetarët që sa herë këta kryetarë të dalin para mediave t’i kërkojnë llogari përse nuk kanë tërhequr kandidatët e dënuar me vendim gjykate. Kjo pyetje e qytetarëve do t’i përndjekë përgjatë gjithë fushatës.”, u shpreh Bojaxhi.
(S. SH/SHUPLAKA)
