Komandanti i KFOR-it raporton për Veriun: Situatë e paqëndrueshme! Jemi të gatshëm të ndërhyjmë nëse ka akte të dhunës

Komandanti i KFOR-it, Angelo  Ristuccia ka folur mbrëmjen e së hënës në një konferencë për mediat për përshkallëzimin e tensioneve në veri të Kosovës.

Gjatë konferrencës ai deklaroi se forcat e NATO-s në Kosovë janë në gatishmëri për tu përballur me çdo situatë nëse aktet e dhunës të ngjashme me takimet e fundit kërcënojnë paqen.

Më tej, Ristuccia tha se situata mbetet shumë e tensionuar, pavarësisht qetësisë relative në ditët e fundit.

“Ne jemi këtu për të shmangur përkeqësimin e situatës dhe për të ulur tensionet në rritje. Pra, e vetmja gjë që mund të them është të ftoj të dyja palët që të marrin të gjitha masat, të gjitha masat e nevojshme për të de-përshkallëzuar situatën. Të gjithë njerëzit në Kosovë, pavarësisht nga feja, përkatësia etnike, kultura e tyre, nuk kanë nevojë që situata të përkeqësohet më tej”, tha kreu i KFOR.