Është konfirmuar në detyrë nga Komisioni i Pavarur i Kualifikimit prokurorja Elisabeta Imeraj, e cila ka rezultuar e pastër në të treja kriteret e vlerësimit, pasuria, pastërtia e figurës dhe aftësitë profesionale.
Vendimi është dhënë pak minuta më parë në KPK, ndërkohë që disa ditë më parë Imeraj u përzgjodh nga Këshilli i Lartë i Prokurorisë në krye të prokurorisë së Tiranës.
Trupa gjykuese e KPK-së që kreu vlerësimin për Imerajn përbëhej nga Olsi Komici kryesues, Roland Ilia relator dhe Suela Zhegu anëtare.
Elisabeta Imeraj përfundoi Shkollën e Magjistraturës në vitin 2005 dhe punoi për 13 vite si prokurore në Prokurorinë e Krimeve të Rënda. Në gusht 2018, ajo u komandua si drejtuese e Prokurorisë së Tiranës, ndërkohë që kishte kandiduar për t’u bërë pjesë e Prokurorisë së Posaçme, SPAK.
Elisabeta Imeraj nuk është një emër i panjohur për publikun. Ajo ka hetuar disa nga çështjet më të nxehta në vend, përfshirë edhe dosjen për ish-ministrin e Brendshëm Saimir Tahiri për të cilin kërkonte heqjen e imunitetit për ta arrestuar.
Ishte maxhoranca ajo ai që pengoi në Komisionin e Mandateve arrestimin e ish-ministrit të Brendshëm të akuzuar nga Prokuroria për trafikun e drogës.
Dosja Tahiri nuk është e vetmja e bujshme që ka hetuar Imeraj. Ajo ka hetuar dosje të tjera të bujshme si ajo e Shullazit, Orest Sotës, të cilit iu gjetën 863 mijë euro në makinë, që sipas prokurorisë nuk justifikoheshin dhe kishin si adresë ish-ministrin Saimir Tahiri, dosjen e 9 imamëve të cilët janë dënuar për terrorizëm por edhe grupin e trafikantit ndërkombëtar të drogës Met Kananit, i njohur si ‘Eskobari shqiptar’.
(E.K/Faxweb.al)
Discussion about this post