Duke nisur nga sot Kosova ka prefiksin e saj telefonik, 383. Unioni Ndërkombëtar i Telekomunikacionit, e vendosi Kosovës në listën zyrtare të shteteve që kanë kode telefonike dhe e publikoi në faqen e vet zyrtare.
Ministrja për Dialog në qeverinë e Kosovës, Edita Tahiri, e cila ishte tash e gjashtë vjet pjesë e këtyre bisedave me Serbinë, tha se ky lajm përbën një të arritur historike për Kosovën.
“I bëjmë me dije opinionit se ITU në pajtim me marrëveshjen e telekomit ka publikuar kodin telefonik për Kosovën. Ky lajm përbën një të arritur historike për fushën e telekomit dhe fuqizon subjektivitetin ndërkombëtar të shtetit të Kosovës”, shprehet Edita Tahiri.
Pas këtij vendimi reagoi edhe kryeministri i Kosovës, Isa Mustafa.
“Kosova ka shënuar një arritje të madhe duke bërë një hap të rëndësishëm në kompletimin e elementeve të shtetësisë. Ndarja e kodit telefonik ndërkombëtar e forcon sovranitetin dhe subjektivitetin e shtetit”, tha kryeministri Mustafa.
Kodi telefonik për Kosovën vjen pas një marrëveshjeje ndërmjet Kosovës dhe Serbisë, në kuadër të dialogut të ndërmjetësuar nga Bashkimi Evropian, për përmirësimin e marrëdhënieve ndërmjet dy vendeve.
Që pas përfundimit të luftës, 1999, Kosova përdor tri kode telefonike, 381 që ishte pronë e ish federatës jugosllave, kodet për telefoninë celulare, 377 kodin telefonik të Monakos dhe 386 kodin telefonik të Sllovenisë.
Kodi i ri 383 telefonik i Kosovës, do të fillojë të aplikohet nga janari i vitit 2017 dhe përfitimet e Kosovës për një periudhë të caktuar sipas tyre do të jenë mbi 100 milionë euro.
