Në një intervistë për Deutche Welle, drejtori i Përgjithshëm për Sigurinë Publike në Policinë e Shtetit, Altin Qato, pranon përfshirjen e policëve në kultivimin e kanabisit, por sipas tij, ky nuk është një fenomen.
Ai tregon se janë 40 policë të proceduar penalisht, 8 prej tyre janë të arrestuar. Po kështu, sipas Qatos, janë rreth 43 procedime displinore që sipas informacioneve nuk kanë vepruar, ose nuk kanë kryer detyrën si duhet për goditjen e këtij aktiviteti.
“Për momentin që flasim kemi rreth 40 procedime penale të punonjësve të policisë, 8 prej tyre janë të arrestuar, janë rreth 43 procedime displinore që sipas informacioneve tona, ata nuk kanë vepruar, ose nuk kanë kryer detyrën si duhet për goditjen e këtij aktiviteti. E theksoj nuk është fenomen, po të kujtojmë numrin e lartë të bimëve të asgjësuara, ndërkohë që kemi vetëm për këtë vit që flasim kemi rreth 9000 forca policie të angazhuara për goditjen e këtij aktiviteti, me një kosto rreth 6 milionë dollarë që shpenzon policia nga buxheti i saj. Ne jemi të motivuar”, shprehet Qato.
I pyetur se sa persona janë arrestuar në aksionet kundër kanabisit, zyrtari i lartë i Policisë së Shtetit shprehet se, nga 1600 procedime, 20% janë zbuluar, ndërsa puna për gjetjen e autorëve vazhdon.
“Vetëm për këtë vit kemi rreth 1670 procedime penale të nisura të referuara në prokurori, ku bëjmë veprime të rregullta proceduriale. Nga këta 400 autorë janë të identifikuar si kultivues, rreth 252 prej tyre janë të arrestuar, por puna fokusohet edhe tek grupe të organizuara që merren me trafikimin e drogës në vendet e Bashkimit Europian. Pjesa tjetër është e shpallur në kërkim. Pra nga këto 1600 procedime, 20% janë zbuluar, por puna për gjetjen e autorëve vazhdon”, shprehet Altin Qato.
Kultivimi i kanabisit është një prej problemeve më të mëdha të vendit, ndaj dhe Bashkimi Europian në një prej kushteve që i ka vënë Shqipërisë në rrugën e hapjes së negociatave është pikërisht lufta kundër këtioj fenomeni.
Discussion about this post