Mendohet që 35-650 mijë lekë të vjetër të varijojë shifra e pagesës për trupën zgjedhore që do të angazhohet në komisionet e votimit dhe ato të numërimit.
Pritet që së shpejti Komisioni Qendror i Zgjedhjeve të miratojë masën e shpërblimit për Administratën Zgjedhore. Në projektvendimin me shifrat përkatëse që do të miratohen nesër, të siguruar nga “Shqiptarja.com”, citohet se do të caktohet masa e shpërblimit në vlerën 65.000 lekë për kryetarin dhe zv/kryetarin e KZAZ-së, për angazhimin nga momenti i konstituimit deri në shpalljen e rezultatit përfundimtar të zgjedhjeve.
Anëtarët dhe Sekretari i KZAZ-ve priten të shpërblehen në vlerën 60.000 lekë për angazhimin nga momenti i konstituimit deri në shpalljen e rezultatit përfundimtar të zgjedhjeve. Projektvendimi parashikon masën e shpërblimit prej 4.000 lekë për Kryetarin e KQV-së dhe 3.500 lekë për anëtarin dhe sekretarin e KQV-së.
“Do të caktohet masa e shpërblimit në vlerën 6.000 lekë për anëtarin e Grupit të Numërimit të Votave. Kodi Zgjedhor përcakton kompetencën e KQZ-së të caktojë masën e shpërblimit për anëtarët e komisioneve zgjedhore dhe anëtarët e grupeve të numërimit të votave.”, citohet në projektvendim.
Në caktimin e masës së shpërblimit, Komisioni Qendror i Zgjedhjeve merr në konsideratë kohën e funksionimit të këtyre komisioneve, ngarkesën e punës, përgjegjësinë e tyre në administrimin e procesit zgjedhor në zonën e administrimit zgjedhor. KZAZ-ja ngrihet 90 ditë para datës së zgjedhjeve dhe do të jetë në detyrë deri në dorëzimin në KQZ të dokumentacionit zgjedhor përkatës.
Sa i takon propozimeve për anëtarët dhe sekretarin e KQV-së, ato bëhen jo më vonë se 30 ditë para ditës së zgjedhjeve dhe KZAZ-ja emëron anëtarët e KQV-së jo më vonë se 5 ditë nga paraqitja e propozimeve. Në çdo rast emërimi i tyre bëhet jo më vonë se 20 ditë para datës së zgjedhjeve. Anëtarët e KQV-së janë në detyrë deri në dorëzimin e kutisë së votimit dhe materialeve zgjedhore në VNV.
Mësohet se të enjten, më 12.11.2017, KQZ do të zhvillojë mbledhjen me këtë rend dite: ““Për caktimin e njësive administrative ku do të krijohen selitë e KZAZ-ve për zgjedhjet për Kuvend të datës 18.06.2017”. (XH.A/SHUPLAKA)
