Pas vendimit të Ministrisë së Shëndetësisë për të shtyrë për në 9 janar hapjen e çerdheve, kopshtve dhe shkollave për shkak të epidemisë së gripit, reagon edhe kryeministria.
Kjo e fundit i bën thirrje subjekteve private t’iu japin pushim një prej prindërve që kanë fëmijë të vogël për datat 4,5 dhe 6 janar.
“Qeveria, në vijim të masave parandaluese të Ministrisë së Shëndetësisë, vendosi edhe caktimin e këtyre datave, 4, 5 dhe 6 janar 2017, ditë pushimi për një nga prindërit që kanë fëmijë të mitur që frekuentojnë/ndjekin ose jo çerdhet, arsimin parashkollor dhe arsimin fillor, që janë nëpunës civilë dhe punonjës të tjerë të administratës publike, të nivelit qendror dhe vendor, si dhe në institucionet e tjera shtetërore.Qeveria iu bën thirrje edhe të gjithë punëdhënësve privatë që të gjejnë mundësitë për trajtimin me pushim të një nga prindërve që kanë fëmijëve të mitur që frekuentojnë/ndjekin ose jo çerdhet, arsimin parashkollor dhe arsimin fillor”, thuhet në njoftimin e qeverisë.
Masat, sipas kryeministrisë, vijnë si pasojë e gripit dhe motit të ftohtë që ka mbërthyer vendin.
Më herët Ministria e Arsimit dhe Sportit aprovoi vendimin e Ministrisë së Shëndetësisë për të mbajtur të mbyllura institucionet e arsimit parashkollor dhe parauniversitar deri më 9 janar. (A.R/SHUPLAKA)
Discussion about this post