Një fëmijë 10-vjeçar në Kuçovë shfrytëzohej për video TikTok-u nga babai dhe gjyshja e tij. Në video fëmija shfrytëzohej për të thënë fjalë denigruese dhe banale. Mamaja e 10-vjeçarit e cila ishte e ndarë nga bashkëshorti, bëri kallëzim në Komisariatin e Kuçovës në dhjetorin e 2023.
Pas hetimeve dy-mujore, shërbimet e policisë shpallën në kërkim babain e fëmijës Armando Kumaraku, 44 vjeç dhe gjyshes së 10-vjeçarit Natasha Rromobola, 67 vjeçe.
Në bashkëpunim me Komisariatin e Policisë Sarandë u bë e mundur finalizimi i operacionit “Show” ku u vunë në pranga babai dhe gjyshja të cilët u shoqëruan në Komisariatin e Policisë Sarandë për veprime të mëtejshme.
Njoftimi i Policisë:
Kuçovë
Finalizohet pas 2 muajsh hetime me metoda proaktive, operacioni policor i koduar “Show”.
Operacioni, nga Komisariati i Policisë Kuçovë, në bashkëpunim me Komisariatin e Policisë Sarandë, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Berat.
Shfrytëzonin një të mitur 10 vjeç, me qëllim përfitimin nga rrjeti social TikTok, duke postuar video të tij, me fjalë denigruese dhe banale, vihen në pranga 2 shtetas (babai dhe gjyshja e të miturit).
Specialistët e Seksionit për Hetimin e Krimeve të Komisariatit të Policisë Kuçovë, pas kallëzimit të marrë në muajin dhjetor 2023, nga shtetasja E. A., se ish-bashkëshorti i saj dhe nëna e tij, postonin në rrjetin social TikTok, video ku shfaqej djali i saj i mitur 10 vjeç, duke përdorur fjalë denigruese dhe banale, menjëherë kanë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Berat, e cila regjistroi procedimin penal për këtë rast.
Si rezultat i hetimeve dymujore me metoda proaktive, u bë shpallja në kërkim e shtetasve A. K. dhe N. R.
Pas sigurimit të inteligjencës policore, nga specialistët për Hetimin e Krimeve të Komisariatit të Policisë Kuçovë, për vendndodhjen e këtyre 2 shtetasve, u organizua në bashkëpunim me Komisariatin e Policisë Sarandë, operacioni policor i koduar “Show”.
Në kuadër të operacionit, u kapën në Sarandë, 2 shtetasit e shpallur në kërkim, të cilët më pas u shoqëruan në Komisariatin e Policisë Kuçovë, për veprime të mëtejshme procedurale.
Në përfundim të veprimeve të kryera në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Berat, specialistët për Hetimin e Krimeve të Komisariatit të Policisë Kuçovë kanë ndaluar shtetasit A. K., 44 vjeç dhe N. R., 67 vjeçe, të dy banues në Sarandë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Berat, për veprime të mëtejshme.
Discussion about this post