Komisioni Qendror i Zgjedhjeve u hoqi sot mandatet kryebashkiakut Elvis Rroshi dhe deputetëve Dashamir Tahiri e Shkëlqim Selami. Mësohet se për kryebashkiakun Rroshin dhe Selamin vendimi ka qenë unanim, ndërsa për Dashamir Tahirin votimi ka qenë 4 me 3.
Heqja e mandateve për deputetët e PD-së e LSI-së, respektivisht Dashamir Tahiri dhe Shkëlqim Selami, në zbatim të ligjit të dekriminalizimit pritet që të rrisë numrin e votave të maxhorancës.
Bëhet e ditur se pas vendimit të KQZ-së sot, deputeti i LSI-së Shkëlqim Selami, do të zëvendësohet nga Flamur Çelaj ose Katina Gogo, që vijojnë listën e kandidatëve për qarkun e Vlorës për këtë parti.
Nga ky vendim pritet që numri i deputetëve që votojnë për maxhorancën të shkojë në 90, ndërsa Partia Demokratike të bjerë në numrin 44. Kjo për shkak se Dashamir Tahiri, pas largimit nga PDIU, iu bashkua grupit parlamentar të Partisë Demokratike.
Heqja e mandatit të tij nga KQZ, do t’i japë mundësi kandidatit të listës së Partisë Drejtësi, Integrim dhe Unitet (PDIU) në qarkun e Vlorës të jetë pjesë e Kuvendit. Ndërkohë, emri që pritet të zëvendësojë Bashkim Tahirin, bazuar në listën e zgjedhjeve të 2013-ës të PDIU-së, është Edmond Zeno.
Në këtë mënyrë, një deputet i ikën Partisë Demokratike dhe i shtohet PDIU-së, koalicionit qeverisës.
Komisioni Qendror i Zgjedhjeve vendosi sot edhe për heqjen e mandatit të kryebashkiakut të Kavajës Elvis Rroshi. Do të jetë Këshilli i Ministrave që do të vendosë përfundimisht për shkarkimin ose jo të Rroshit. Në rast të shpalljes së pavlefshme të mandatit të tij, Kavaja do të shkojë në zgjedhje të parakohshme, data e të cilave do të miratohet me dekret nga presidenti Bujar Nishani, i cili ka 30 ditë kohë nga momenti i njoftimit zyrtar. (XH.A/SHUPLAKA)
