Kthesa të papritura kanë karakterizuar Partinë Demokratike lidhur me listat e kandidatëve për deputetë, të cilët kanë zgjedhur të tërhiqen nga gara nën siglën e PD-së për zgjedhjet parlamentare të 25 qershorit, siç ka edhe emra që u përfolën por vazhdojnë të jenë pjesë ende, krahas atyre që mundet të shpallin së afërmi tërheqjen.
Pesë janë kandidatët demokratë që morën vendimin të tërhiqen nga listat e kandidatëve demokratë për deputetë, ku arsye që i ka shtyrë ka qenë më së përgjithësisht pakënaqësia e ngjallur ndër ta për shkak të renditjes në këto lista.
Sazani Guri, i pesti në listën e PD-së për Beratin vendosi të tërhiqej për shkak se ishte i pakënaqur në renditjen nga fundi në listën me 7 kandidatë. Tërheqja e tij u ndoq nga ajo e Bujar Hoxhës.
Ramiz Çobaj, kandidat në Shkodër e njëherazi kryetar dege i PD-së, la gjithashtu garën. Ai u shpreh se ndihej i fyer nga renditja i 8 në listën e Shkodrës. Në letrën për Bashën, ai shprehte edhe dorëheqjen e tij si kryetar i degës së PD-së në qytetin verior.
Një tjetër emër në Shkodër, Helidon Bushati, është kandidati më i fundit që vendosi të dorëhiqet nga lista e kandidatëve për deputetë në Shkodër. Ai renditej i katërti në listën e PD-së në këtë qytet.
Sulejman Gjana vendosi gjithashtu të largohet nga listat e Partisë Demokratike në Dibër, ku ai renditej i katërti. Në letrën e tij shprehej se vendimin e mori pas reflektimit mbi realitetin e ri që krijoi marrëveshja Rama-Basha.
Ata që nuk u tërhoqën dhe që mund të tërhiqen:
Blendi Himçi, Sekretar i PD-së në Elbasan, u përfol për tërheqje, por do të vazhdojë garën, sikundër të tjerë emra si Dashamir Tahiri dhe Adriatik Alimadhi që vendosën të qëndrojnë pavarësisht hipotezave për tërheqje të mundshme të tyre.
Nuk dihet ç’do ndodhë me Lefter Maliqin në Berat, kandidati që një ditë më parë i bëri një ultimatum kryedemokratit Basha, të cilin e priste në takim deri në mesnatë. Një emër që po vazhdon të lakohet për tërheqje nga listat, është ai i Arben Ristanit në Vlorë.
(XH.A/SHUPLAKA)
