Deputetja Rudina Hajdari ka publikuar draftin për ndryshime të projektligjeve në Kodin Zgjedhor, ku ka propozuar ndryshim të projektligjit “Për disa shtesa dhe ndryshime në ligjin nr. 10019 dt.29.12.2008”, “Kodi Zgjedhor i Republikës së Shqipërisë”, i ndryshuar.
Drejtuar kryetarit të Kuvendit, Gramoz Ruçi deputetja thekson se projektligji synon ndryshime në Kodin Zgjedhor, për të bërë verifikimin e figurave publike duke synuar sipas saj transparencë, besueshmëri në zgjedhjet e përgjithshme.
Hajdari tha se ka ardhu koha qe pas 30 vitesh tranzicion, të bëhet një transparencë e plotë e personave që kanë mbajtur poste drejtuese gjatë periudhës së regjimit komunist.
Këto pretendime Hajdari i tha dhe në Komisionin për Reformën Zgjedhore, ku u shpreh se gjeti dhe dakordësinë e tre pjesëmarrësve të tjerë të tryezës. Një tjetër çështje që është diskutuar sot në Komision ka qenë dhe futja e votimit dhe numërimit elektronik në zgjedhje.
“Ka ardhur koha që ta hedhim këtë hap, të kemi një lustracion të figurave për deputetë.
Mendoj se ky është një hap shumë i mirë, propozimi ka ardhur me një model polak, dhe duhet pastruar njëherë e mirë politika nga ata persona që kanë pasur gisht në internimin dhe në vrasjen e shqiptarëve gjatë regjimit komunist.
Kemi rënë dakord dhe për përdorimin e teknologjisë gjatë procesit zgjedhor, por palët janë duke punuar bashkë me njëra tjetrën, dhe teknologjia do të përdoret që në zgjedhjet e ardhshme”, u shpreh Hajdari përpara gazetarëve.
Discussion about this post