Përparimi i Ugandës në trajtimin e HIV-it është “në rrezik serioz” pasi u miratuan ligje të reja të ashpra kundër homoseksualëve, kanë paralajmëruar OKB dhe SHBA.
Madje ata shtojnë se gjithnjë e më shumë njerëz dekurajohen të kërkojnë shërbime shëndetësore nga frika e sulmeve dhe ndëshkimeve.
Presidenti Museveni më në fund nënshkroi ligjin kundër homoseksualitetit , por pasi parlamenti e dobësoi atë në krahasim me origjinalin. Megjithatë, ajo ende renditet ndër ligjet më të ashpra anti-LGBTQ në mbarë botën .
Aktet homoseksuale janë tashmë të paligjshme në Ugandë, vëren BBC, por tani kushdo që dënohet përballet me burgim të përjetshëm.
Legjislacioni vendos dënimin me vdekje për të ashtuquajturat vepra të rënda , të cilat përfshijnë marrëdhënie homoseksuale me dikë nën moshën 18 vjeç ose kur dikush është i infektuar, si për shembull me HIV.
Vetëm një deputet votoi kundër projektligjit gjatë votimit në parlamentin e vendit.
Legjislacioni është dënuar edhe nga aktivistët në Ugandë, të cilët kanë nisur procedurat ligjore për të rrëzuar ligjin me arsyetimin se ai është diskriminues dhe cenon të drejtat e personave LGBTQI.
Një ligj i ngjashëm u rrëzua nga gjykata kushtetuese e Ugandës në vitin 2014.
Reagimi i SHBA-ve
Ligji përbën një “shkelje tragjike” të të drejtave të njeriut dhe duhet të shfuqizohet, tha të hënën Presidenti i SHBA Joe Biden , duke përmendur pasojat e mundshme për ndihmën dhe investimet e SHBA në Ugandë.
Presidenti amerikan ka sqaruar se ka kërkuar nga shërbimet e tij që të studiojnë pasojat e këtij “ligji të turpshëm”, siç tha ai, në “të gjitha aspektet e bashkëpunimit” mes dy vendeve.
Kjo përfshin aftësinë e SHBA-së për të ofruar shërbime të sigurta sipas Planit të Emergjencave të Presidentit të SHBA për Ndihmën ndaj SIDA-s (PEPFAR) dhe forma të tjera ndihme dhe investimi.
Miratimi i këtij ligji “minon perspektivat për rritje ekonomike domethënëse për të gjithë vendin,” shtoi Biden, duke bërë thirrje për “tërheqjen e menjëhershme të tij”.
