Liverpuli ka bërë një tjetër hap fals në rrugën drejt titullit kampion të Premier Ligës. Të kuqtë janë mundur në shtëpi me rezultatin 3-2 ndaj Suonsit, në ndeshjen hapëse të javës së 21-të.
Pas një barazimi pa gola në pjesën e parë, sfida në “ Anfild Road” u bë më emocionante në pjesën e dytë.
Ishin miqtë ata që kaluan në epërsi me anë të një dopiete të Fernando Jorentes, i cili arriti të shënonte dy gola mjaft të shpejtë brenda 5 minutash.
Por përgjigja e vendasve nuk vonoi shumë sepse me anë të një dygolëshi të Firminos, arritën ta vendosnin ndeshjen në baraspeshë.
Sakaq hidhërimi i vendasve erdhi në minutën e 74, ku Sigurdson shënoi një gol që pati vlerën e 3 pikëve për Suonsin. Kjo disfatë për ekipin e Klopit vjen pas një viti pa humbje në shtëpi dhe e lë me 45 pikë duke e zbritur në vendin e tretë, por nëse rivalët e tij fitojnë mund të bierë edhe më poshtë. (K.P/Shuplaka)
Discussion about this post