Mblidhet komisioni për Reformën Zgjedhore, Oerd Bylykbashi: “Shit-blerja e votës të jetë vepër penale”

Është mbledhur së fundmi Komisioni parlamentar për Reformën Zgjedhore ku po diskutohet materiali i dorëzuar nga partitë në sekretari.

Lidhur me materialin e dorëzuar, anëtari demokrat Fatmir Mediu kërkoi qëndrimin e Komisionit Zgjedhor të Zgjedhjeve lidhur me dokumentin e dorëzuar. Në përgjigje të tij, bashkëkryetari i komisionit nga PS, Taulant Balla, bëri me dije se në mbledhjen e ardhshme do të thirret kreu i KQZ-së, Denar Biba.

Në fjalën e tij, bashkëkryetari demokrat i Komisionit Zgjedhor, Oerd Bylykbashi, vuri theksin në rëndësinë e votës së lirë. Ndër marrjet e masave, Bylykbashi renditi rëndësinë e dënimit të shit-blerjes së votës.

“Sot na erdhi përballë një dokument. Një gjë duhet të jetë e padiskutueshme në këtë komision, shqetësimet të trajtohen me prioritet së bashku dhe pa diskutim.  Diskutime të llojit se kush është mandati i këtij komisioni janë justifikime për të shmnagur problematikat reale. Ky dokument kërkon rishikim të kujdesshëm.  Të shmanget marrja e kartës së identitet që është anulim i të drejtës së votës, të shmanget korruptimi i komisionerëve. Duhet të reduktojmë shpenzimet e fushatave elektorale, politika nuk duhet t’u kushtojë shqiptarëve. Duhet që shit-blerja e votës të kthehet në vepër penale. Janë një grup çështjesh të përcaktuara qartë në qëndrimin e PD-së lidhur me reformën zgjedhore. Ne do ngulim këmbë që këto ëështje të trajtohen tani së bashku.”

(XH.A/SHUPLAKA)