Kryeministri, Edi Rama ka reaguar për herë të parë pas pakënaqësive që ngjalli vendimi i qeverisë për mbylljen e shkollës “Mehmet Akif”.
Rama tha se përfaqësuesit e kësaj shkolle kishin shitur godinën ku kishin lejen e aktivitetit shkollor dhe e kishin hapur aktivitetin në një godinë tjetër e cila nuk përmbushte kriteret ligjore.
Mes të tjerash, kryeministri shkruan se rreth këtij vendimi ishin shpërndarë teori konspirative dhe lajme të pavërteta, duke theksuar se kolegji në fjalë po luante rolin e viktimës, duke përdorur nxënësit.
Reagimi i plotë i Ramës:
Pas çdo vendimi kërkohet një qëllim tjetër nga i vërteti dhe bombardohet publiku me lajme të rreme e me teori konspiracioni! S’ka asgjë të tillë dhe asnjë qëllim tjetër përveç zbatimit të barabartë të ligjit në rastin e heqjes së një liçence shkolle si plot të tjera më parë.
Të shesësh godinën ku ke lejen e aktivitetit shkollor dhe të hapësh aktivitetin diku tjetër, pa marrë lejen sipas ligjit, pa plotësuar kriteret e pa përmbushur standartet e kërkuara ligjërisht, është një shkelje për të cilën ligji parashikon heqjen e liçencës.
Përdorimi i fëmijëve pastaj për të fshehur fajin karshi ligjit, prindërve dhe vetë nxënësve, duke luajtur rolin e viktimës së qeverisë, kur në fakt je verifikuar jo një po dy herë në shkelje, tregon ndërgjegje të ulët në raport me misionin e lartë të një vatre edukimi.
Discussion about this post