Drejtori i Përgjithshëm i Policisë së Shtetit, Muhamet Rrumbullaku, ka komentuar për mediat ditën e sotme mbi zhdukjen e të shumëkërkuarit Ervis Martinajn. Në një prononcim të shkurtër, pa dhënë detaje, Rrumbullaku tha se strukturat janë të angazhuara maksimalish te hetimet dhe do të flasin mbi fakte dhe prova.
“Mund t’ju them që strukturat e Posaçme të luftës kundër krimit, në Drejtorinë e Përgjithshme dhe në nivel vendor janë të angazhuara maksimalisht. Do të flasim mbi fakte, mbi prova. Nuk mund të flasim pa pasur prova,” -tha në prononcimin e tij, Rrumbullaku.
Ervis Martinaj ishte shpallur në kërkim, në kuadër të operacionit “Plumbi i Artë”, pasi i penduari i drejtësisë Nuredin Dumani, tha se i kishte ofruar një ‘çek të bardhë’ në këmbim të ‘kokës’ së Indrit Dokles. Por, në 9 gusht, ai u zhduk pa gjurmë. Alarmin e ngritën familjarët e Martinajt dhe tashmë prokuroria po heton për rrëmbim personi dhe inskenim. Dokumentet e publikuara në media kanë treguar se Prokuroria ka dal në përfundimin se Martinaj është nxjerrë në pritë nga një vajzë, është rrëmbyer në Durrës dhe është vrarë.