Një skandal në arsimin e ulët është denoncuar sot në emisionin “Fiks Fare”.
Kamerat e emisionit investigativ kanë filmuar një mësuese të ciklit të ulët, e cila me një fjalor fyes dhe kërcënues tremb dhe mallkon nxënësit e klasës së dytë.
Ngjarja ka ndodhur në shkollën 9-vjeçare të Surrelit.
Kanë qenë vetë prindërit e nxënësve që kanë denoncuar rastin e rëndë të mësueses kujdestare të klasës së dytë.
Gjatë vëzhgimit të kryer rezultoi se, mësuesja ofendon dhe u bërtet nxënësve me fjalë të ndryshme fyese, si “Llafazane”, “Debile”, “Vajzë e keqe” dhe “Pise”. Mësueseja jep mësim vetëm pak minuta larg kryeqytetit në Surrel.
Madje, ajo i kërcënon nxënësit me fjalor rruge, duke u thënë “Do t’i shkul flokët dhe të shkosh në shtëpi tullace”, “Do t’i heq dhëmbët një e nga një”, “Do ta çaj gojën”.
Por kjo nuk ndodh vetëm një herë të vetme, por në të gjitha orët e mësimit dhe çdo ditë. Madje, për një gabim që bën një nga nxënësit, ajo e kërcënon me shprehjen “Do të shkul kokën”. Po ashtu, ka raste që iu thotë “Vdekshi”, “Më çmendët”, ndërkohë që kur një nxënëse vjen e sëmurë në klasë i thotë “do më ngjisë gripin idiotja e dreqit”, “ti je e çmendur”.
Ky nuk është rasti i parë kur ngjarje të tilla ndodhin në mjediset shkollore. Të tjera raste të dhunës psikologjike dhe fizike janë bërë publike nëpërmjet medias. (M.D/ Shuplaka)
