Gazetari Baton Haxhiu mbrëmjen e djeshme deklaroi se për krizën politike në vendin tonë janë përgjegjës Presidenti Meta dhe ish-kryeministri Sali Berisha, që sipas tij synojnë që të pengojnë bashkimin e Kosovës.
Lidhur me këto deklarata ka reaguar dhe zëdhënësi i presidentit Meta, Tedi Blushi, i cili e quan Haxhiun zëdhënës të Stanishiçit, ndërsa shton se Meta ka qenë gjithnjë për një stabilitet të rajonit.
Shkruan Blushi: Shpifjet e zëdhënësit të Stanishiçit sot kundër Presidentit Meta si shkaktar i pengimit të bashkimit të Kosovës me Shqipërinë dhe nxitës i krizës së brendshme në Shqipëri janë të qëllimshme e të pashpresa për ata që duan të kthejnë rajonin tonë në kohët e errëta të urrejtjes ndëretnike dhe duke damkosur shqiptarët si faktor krize e destabiliteti. Qëndrimet e Presidentit Meta kanë qenë të qarta në interes të stabilitetit rajonal dhe interesit kombëtar të shqiptarëve.
Çfarë deklaroi Baton Haxhiu: Kjo krizë e ka një parantezë. Nuk është krizë lokale, nuk është krizë kundër Edi Ramës e korrupsionin. E ka referencën e dy njerëzve Ilir Metës dhe Sali Berishës. Të cilët narracionin kundër kryeministrit e kanë lidhur me korrigjimin e kufijve dhe me Kosovën më shumë.
Ky narracion e ka ashpërsuar diskursin deri në atë pikë sa kaluan nga një agresivitet kundër Ramës për shkakun se po merr aurën e njeriut që po zgjidh problemet me shqiptarët me këtë që kemi sot. Kjo krizë politike është produkt i dy njerëzve Sali Berishës edhe Ilir Metës.
Meqë jemi tek kjo pikë që ia dhanë Ramës meritat më shumë se sa meritonte apo kishte fuqi dhe kishin frikë se bashkimi i Kosovës me Shqipërinë, që ajo nuk bëhet mund t’i adresohet një njeriu, e krijuan krizën politike të brendshme. Kjo është esenca se çfarë ka ndodhur në Shqipëri.
Gazetari që njëherësh ka qenë dhe këshilltar i kryeministrit Rama gjatë të gjithë emisionit të djeshëm Opinion u shpreh se opozita në Shqipëri nuk ka asnjë arsye për të protestuar.
(E.K/FAXWEB.AL)
