Penalltia e humbur ndaj Romës në ndeshjen që Milani e humbi 1-0 duket se nuk është kaluar lehtë nga tekniku kuqezi, Vincenzo Montella.
Trajneri i Milanit ka folur në prag të ndeshjes ndaj Atalantas, duke u shprehur se tashmë është Bacca lojtari që do të godasë penalltinë nëse do të ketë të tilla.
“Penalltitë? Nëse Bacca është në fushë do t’i gjuajë ai, por nëse nuk do të luajë, Niang nuk është zgjedhja e parë. Merkato? Mendoj vetëm për lojtarët që kam në dispozicion. Shikoj shumë pak skuadra sipër nesh dhe shumë që na ndjekin”, u shpreh Montella.
Montella kërkon që skuadra të mos mendojë për duelin e Superkupës së Italisë ndaj Juventusit, por të përqendrohet maksimalisht në ndeshje ndaj Atalantas.
“Kjo është një ndeshje që mund të na ndihmojë ta mbyllim vitin në vendin e tretë, prandaj për ne është shumë e rëndësishme dhe ky fakt do të na ndihmojë të mos mendojmë përpara kohe për ndeshjen e Dohas”, tha Montella.
Milan-Atalanta luhet nesër në ora 18:00.
