Ministri i Brendshëm francez Gerard Collomb ka qenë sot në vendin tonë ku mes të tjerash ka pasur edhe një takim me kryeministrin Rama. Në konferencën për mediat, ministri u shpreh se një problem shqetësues vijon të mbetet çështja e azilkërkuesve nga Shqipëria.
Ai tha se 20% e numrit të azilkërkuesve në Francë janë me orgjinë nga Shqipëria, ndërsa Collomb vuri theksin dhe në goditjen e grupeve të strukturuara kriminale.
“I pata premtuar ministrave që kisha dëshirë që të vija në Tiranë që të takohesha me juve, madje kemi folur edhe së bashku në telefon. Dhe sot jam shumë i lumtur për takimin me ju. Çështja e azilkërkimit për ne është shumë e rëndësishme pasi 20% e azilkërkuesve në vendin tonë është nga Shqipëria. Duhet që të gjeni një mënyrë që të ndaloni njerëzit që të largohen nga Shqipëria.
Po ashtu edhe për luftën kundër rrjeteve kriminale, bashkëpunimi kundër krimit të organizuar është një problem global dhe ne në sajë partneritetit duhet të arrijmë rezultate. Ne mirëkuptojmë aspiratën tuaj për të qenë pjesë e BE-së. Tashmë jemi në një botë të re, ku edhe ne kemi nevojë për të bërë reforma, sidomos në aspektin ekonomik, pasi qytetarët tanë kishin dyshimet e tyre në lidhje me Europën.
Ndonjëherë në vendet perëndimore, ëndrra europiane ka humbur, prandaj nevojitet një frymë e re, atë që po bënë edhe presidenti ynë. Ai po mundohet që të qetësojë tensione dhe të vendos paqen në shumë vende të botës. Prandaj edhe qeveria jonë po bën një sërë reformash”, u shpreh mes të tjerash ministri francez.
(E.K/Faxweb)
Discussion about this post