Ministri për Evropën dhe Punët e Jashtme të Shqipërisë, z. Igli Hasani, ishte pjesë e delegacionit zyrtar shqiptar që mori pjesë në ceremoninë mortore të Papa Françeskut, e mbajtur sot në Vatikan.
Në një reagim në rrjetet sociale, ministri Hasani i dha lamtumirën Atit të Shenjtë, duke e cilësuar atë si një figurë frymëzuese në shërbim të paqes dhe njerëzimit.
“Sot, në Vatikan, i japim lamtumirën Atit të Shenjtë, një udhëheqësi të paqes dhe një njeriu me dashuri dhe shërbim të jashtëzakonshëm për njerëzimin,” shkruan ministri Hasani.
Duke vlerësuar kontributin e Papa Françeskut, Hasani thekson se ai ishte gjithmonë pranë më të brishtëve dhe udhëhoqi me shembull, duke zgjedhur “forcën e butë të mëshirës dhe fuqinë e heshtur të përulësisë.”
“Trashëgimia e Tij shpirtërore do të mbetet e gjallë në zemrat e miliona njerëzve për brezat që vijnë. Me lutje dhe mirënjohje nga Shqipëria, nderojmë kujtimin e Tij të paharruar,” përfundon ministri.
Ceremonia e sotme në Vatikan mblodhi liderë fetarë dhe përfaqësues shtetërorë nga mbarë bota, të cilët nderuan jetën dhe veprën e Papa Françeskut, një prej figurave më të dashura dhe frymëzuese të shekullit XXI.
