Një projekt të ri që synon të adresojë nevojat urgjente të personave vulnerabël për të aksesuar në mënyrë të papenguar dhe të barabartë sistemin e drejtësisë është nënshkruar së fundmi mes Ministria e Drejtësisë dhe Programi i Zhvillimit të Kombeve të Bashkuara ( UNDP), përfaqësuar nga Ministri i Drejtësisë, Petrit Vasili dhe Brian J. Ëilliams, Përfaqësues i Përhershëm i UNDP në Shqipëri,
Projekti që do të zgjasë 16 muaj dhe do të ketë pjesë të ndërhyrjeve të tij ofrimin e ekspertizës teknike, për përmirësimin e ligjit të ndihmës juridike në kuadër të reformës në drejtësi dhe përmirësimin e mekanizmave ekzistues të ndihmës ligjore falas në disa zona të përzgjedhura.
Kjo do të arrihet përmes një vlerësimi të situatës së aksesit në drejtësi parë nga këndvështrimi i personave vulnerabël; pilotim të shërbimeve ligjore falas dhe koordinim të ofruesve të shërbimeve për të arritur tek grupet në nevojë.
Theksohet se projekti do të ketë një element që do të synojë informimin e personave të rrezikuar mbi mënyrën e përfitimit të shërbimeve të ndihmës ligjore falas.
“Jam i lumtur që përfitues të drejtpërdrejtë nga ky projekt i ri do të jenë pikërisht njerëz që kanë nevojë dhe falë këtij bashkëpunimi me UNDP, ne mundemi t’u ofrojmë mbështetje për të kërkuar të drejtën e tyre, në kohën e duhur, ndërkohë që kushtet sociale dhe ekonomike nuk ia mundësonin më parë këtë akses. Një tjetër lajm mjaft i mirë është që marrëveshja mbulon dhënien e ndihmës juridike falas nga UNDP dhe bashkëpunëtorët e saj, për qytetarët në Gjykatat e Rretheve Gjyqësore më të rëndësishme si Tirana, Durrësi, Fieri dhe Lezha.”, u shpreh ndër të tjera ministri Vasili.
Njoftohet se gjatë zbatimit të këtij projekti, Ministria e Drejtësise dhe UNDP do të bashkëpunojnë ngushtë me Parlamentin, Agjencitë e zbatimit të ligjit, Organizatat e Shoqërisë Civile, Institucionet e pavarura të të Drejtave të Njeriut, Dhomën Kombëtare të Avokatëve, Institucionet e Drejtësisë, Njësitë e Qeverisjes Vendore, por dhe me institucione akademike apo partnerë ndërkombëtarë.
(XH.A/SHUPLAKA)
