Ministri i Drejtësisë, z. Ulsi Manja, zhvilloi sot një takim të rëndësishëm me Presidentin e Eurojust, z. Michael Schmid, një mik i Shqipërisë dhe partner i çmuar në forcimin e drejtësisë ndërkombëtare.
Në këtë takim u vlerësua bashkëpunimi i shkëlqyer ndërmjet Shqipërisë dhe Eurojust, ku vendi ynë cilësohet si një partnere serioze, efikase dhe aktive në fushën e ndihmës së ndërsjellë juridike. Ministri Manja theksoi angazhimin e vazhdueshëm të institucioneve shqiptare në forcimin e shtetit të së drejtës dhe integrimin europian të vendit.
Një pjesë e rëndësishme e diskutimit iu kushtua Skuadrave të Përbashkëta Hetimore, një mekanizëm efektiv që ka treguar rezultate konkrete në luftën kundër krimit të organizuar transnacional. Përmes bashkëpunimit të ngushtë mes SPAK dhe autoriteteve partnere në Europë dhe Amerikën Latine, janë realizuar operacione të suksesshme që kanë goditur rrjetet kriminale ndërkombëtare.
Ministri Manja ritheksoi përkushtimin e Shqipërisë për të ndërtuar një sistem drejtësie efikas dhe të besueshëm, në shërbim të qytetarëve dhe në përputhje me standardet europiane. Ky takim përforcon edhe më tej partneritetin me Eurojust dhe rolin aktiv të Shqipërisë në arkitekturën e drejtësisë ndërkombëtare.
